6 na patay, higit 100 sugatan sa Surigao quake; marami pa ang ‘di nabilang

Patuloy sa pag-akyat ang bilang ng mga casualties at sugatan sa nangyaring lindol kagabi sa Surigao City.

Iniulat ngayon ni Mary Jul Escalante, information officer ng Provincial Disaster Risk Reduction and Management Office (PDRRMO) ng Surigao del Norte, umaabot na sa anim katao ang patay at nasa 126 ang iniwang sugatan dahil sa pagyanig.

Pinakamarami sa mga isinugod na sugatan ay sa Caraga Regional Hospital.

Ang mga pasyente rin ay pansamantala munang inilagay sa parking space dahil sa pagkakaroon ng bitak ng ilang mga gusali.

Ang nasabing bilang ay ang mga earthquake-related cases na dinala lamang sa ospital.

Pero sinasabing mas marami pa ang sugatan na mga residente na minabuting ‘wag na lamang tumungo sa mga pagamutan.